न्यूयोर्क/अमेरिका
शेर्पा किदुगको आयोजनामा ज्याक्सन हाइट वरपर सरसफाई गरिएको छ । नेपालीे लगायत दक्षिण एसियाली मुलकका आप्रवासीहरुको बाक्लो बस्ती रहेको ज्याक्सन हाइट वरपरका सडक असाध्यै फोहोर भएकाले गत वर्षदेखि किदुगले सरसफाई कार्यक्रम गर्दै आएको हो ।
गत शनिबार गरिएको सरसफाई कार्यक्रममा क्विन्स बोरोका डिस्ट्रिक २५ का काउन्सिलम्यान ड्यानियल ड्रोम, क्विन्सबोरोका काउन्सिलमेम्बर कोष्टा कन्स्ट्यानटिनिडिस र न्यूयोर्क राज्यको एसेम्लीवुमन क्याटलिना क्रुजको सहभागिता थियो ।
वुडसाइड एभिन्युदेखि ३७ एभिन्यु सम्म ज्याक्सन हाइटको ६९ स्ट्रिटदेखि ७७ स्ट्रिट सम्मको सडक सरसफाई गरिएको हो । स्थानीय जनप्रतिनिध र नेपाली संघसंस्थाको प्रतिनिधिको उपस्थितिमा फोहोर नगरौं भन्ने चेतना समुदायमा फैलाउँदै सरसफाई कार्यक्रम गरिएको किदुगका अध्यक्ष उर्गेन शेर्पाले बताए । ‘ज्याक्सन हाइट वरपर सारै फोहोर भयो भनेर काउन्सिलमेम्बरहरु संग छलफल गर्दै सबै मिलेर सरसफाई गरेका हौं’ किदुगका अध्यक्ष शेर्पाले भने, ‘अमेरिकी जनप्रतिनिधिहरु पनि हामी संगै सहभागी भएका हुन् ।’
गत वर्ष घरघरबाट निस्केको फोहोर ब्यवस्थापन आफैले गर्न सकिन्छ । रिसाइकल गर्न सकिने फोहोरहरु रिसाइकल लेखिएको बक्समा, कुहिने फोहोरलाई छुट्टै बक्समा फालौं भन्ने सन्देश लेखिएका पर्चा र पोस्टरहरु समेत बाँडिएको थियो । ‘तिनै पोस्टरहरु बाटोभरी फालेर फोहोर देखिएको पाएपछि यसपाली पर्चा, पम्लेटहरु बाँडेनौं’ उनले भने’ ‘ज्याक्सन हाइट वरपरका सडकमा यतिधेरै फोहोर भेटियो थियो कि अमेरिकी जनप्रतिनिधि हरु नै छक्क परे । त्यो पनि पोहोरको तुलनामा त अतिकति कम नै थियो ।’
सडकमा चुरोटका ठूटा, खानाका प्लेट, फास्टफुटका बट्टाहरु, प्लाटिकका प्याकेट लगायत कतिपय ठाउँमा कुहिएर गन्हाएका फोहोरहरु पनि पाइएको उनले जनाकारी दिए ।
काउन्सिल मेम्बर ड्रोमले किदुग र नेपालीहरुसंग लामो समयदेखि सहकार्य गर्दै आएको बताउँदै सुमदायमा जनचेतना जगाउने यस्ता कार्यक्रमहरुमा सहभागी हुन पाउँदा खुसी ब्यक्त गरे । एसेम्बली वुमन क्रुजले पहिलो पटक सहभागी हुन पाएकोमा खुसी लागेको बताइन् ।