काठमाडौं । उपत्यकाकोबाहिरी चक्रपथ निर्माणमा चिनियाँ कम्पनीले गरेको प्रस्ताव स्वीकृत भएको छ ।

लगानी बोर्डको सोमबार बसेको बैठकले बाहिरी चक्रपथमा चासो देखाएको चिनियाँ कम्पनी ‘चिनियाँ कम्युनिकेसन पूर्वाधार कम्पनीको प्रस्ताव स्वीकृत गरेको हो ।

यो आयोजनामा पनि सरकारले लगानी जुटाउन सकेको छैन । काठमाडौं उपत्यकाको दीर्घकालिन विकास र भविश्यसँग जोडिएको यो आयोजनाको कार्यान्वयनले ठूलो रणनीतिक फाइदा हुने र पूर्वाधार विकासमा देशले ठूलो फड्को मार्ने अपेक्षा गरिएको  छ।

तर, लगानी जुट्न नसक्दा सरकारले यो आयोजना पनि अगाडी बढाउन आँट गर्न भने सकेको छैन ।

लगानी बोर्डले छनोट भएको कम्पनीसँग ४५ दिनभित्र विस्तृत प्रस्ताव पठाउन समेत माग गर्ने निर्णैय गरेको हो ।

बोर्डले अरुण जलविद्युत आयोजनामा परेको तीन वटै प्रस्तावलाई योग्य ठान्दै स्वीकृत गरेको छ । यस आयोजनामा तीन वटा कम्पनीको प्रस्ताव परेको थियो ।

यस आयोजनामा भारतीय कम्पनी एसजेभीएन, चाइना पावर र जापानको जे पावरले प्रस्ताव राखेका थिए ।

बैठकले पश्चिम सेती तथा एसआर  संयुक्त जलविद्युत् परियोजनाका लागि प्रस्ताव पेश गर्नेमध्ये संक्षिप्त सूचीकरण छनोटका लागि ऊर्जा, जलस्रोत तथा सिँचाइमन्त्री वर्षमान पुनको संयोजकत्वमा अलग-अलग समिति गठन गरेको समेत उल्लेख गरेको छ ।

नेपालमा ठूला लगानीका आयोजनाको सहजिकरण गर्न लगानी बोर्ड सक्रिय रहेको छ ।