कला / साहित्य

कवयित्री / गीतकार दिपा राई पुनलाई राजमित्र स्मृति प्रज्ञा पुरस्कार

काठमाडौं

यस वर्षको राजमित्र स्मृति प्रज्ञा पुरस्कारद्वारा  प्रवासमा बसेर पनि निरन्तर नेपाली भाषा साहित्यमा काम गर्दै आएका कवयित्री / गीतकार दीपा राई पुन सम्मानित हुने भएको छ ।

“बिहानको सुनौलो घामले

एक टुक्रा मुस्कान छर्छ

टिपेर सिउरी दिन्छु आफैलाई

सौन्दर्यताको गहना सम्झेर…”

उक्त सम्मान रेडियो नेपालका प्रथम समाचार वाचक राजेन्द्रप्रसाद नेपालको स्मृतिमा स्थापना गरिएको हो । रेडियो नेपाललाई विराटनगर जुट मिलबाट सिंहदरवारभित्र स्थापना गर्न तारणीप्रसाद कोरालासँग सहकार्य गरेका प्रजातन्त्र सेनानी श्रष्टा नेपालको स्मृतिमा स्थापित सो सम्मान नेपाली वाङ्ममयको श्रीवृद्धिका लागि अतुलनीय योगदान पुर्याएवापत दीपा राई पुनलाई प्रदान गर्न लागिएको हो । यसअघि उनले भानुभक्त स्वर्ण पदक, नेपाल सरकार संस्कृति पर्यटन तथा नागरिक उड्डयन मन्त्रालय, सर्वोत्कृष्ट पुस्तक पुरस्कार अनेसास, अनेसास रविना फाउण्डेसन सर्वोत्कृष्ट सुम्निमा पुरस्कार २०१३/१४, प्रवासी नेपाली साहित्यिक प्रतिभा पुरस्कार २०१६ (हङकङ साहित्यिक साझा श्रृङ्खला), ज्योति साहित्य सम्मान २०७२ (ज्योति साहित्य प्रतिष्ठान), साहित्य सम्मान (लायन्स क्लब अव काठमाडौं रेन्बो सीटी), अनल ज्योति सम्मान २०७२ (अनल ज्योति बोर्डिंग स्कूल), राष्ट्रिय नारी सम्मान पत्र – २०७३ (राष्ट्र, राष्ट्रियता र नागरिकप्रति समर्पित), राष्ट्रिय नागरिक विकास समाज विशेष नागरिक सम्मान २०७५, ‘राष्ट्रिय नारी श्रष्टा सम्मान २०७५ (महिला बालबालिका तथा युवा संचेतना समाज नेपाल) लगायतका पुरस्कार र सम्मानहरु पाईसकेका छन् । उनका तीन कविताकृति तिम्रो सपनाको म, स्पन्दनका रागहरू र छुटेको वाग्दाता र एक गीति एल्बम – प्रतिरूप प्रकासित / रेकर्ड भएका छन् ।

सेप्टेम्बरको २८ तारिख २०१९, शनिवारका दिन मोती जयन्ती मनाउँदै भव्य साहित्यिक समारोहका दिन सो पुरस्कार प्रदान गरिने कार्यक्रम रहेको छ । अनेसास बोष्टन च्याप्टर र राजमित्र स्मृति प्रज्ञा प्रतिष्ठानको संयुक्त आयोजनामा सम्पन्न हुने सो कार्यक्रममा यस वर्ष सारङ्गीवादक श्याम नेपालीलाई राजमित्र विशेष सम्मान गरिने राजमित्र स्मृति प्रज्ञा प्रतिष्ठानका अध्यक्ष हरिप्रसाद काफ्ले ‘शैव’ ले जानकारी दिएका छन् ।