ओहायो 

अमेरिकाको ओहायो राज्यको सिन्सिन्याटी शहरमा आयोजना गरिएको गजल यात्राको गजल उत्सव – तेश्रो श्रृंखला भव्यताका साथ सम्पन्न भएको छ । अमेरिकाको पेन्सलभेनिया, न्यूयोर्क, न्यूजर्सी, ओहायो , म्यास्याच्युट्स (बोस्टन), ह्यूस्टन, टेक्सस(डालास), भरमन्ट, कोलोराडो लगायतका विभिन्न राज्यबाट करिब ४४ जना गजलकारहरू उक्त कार्यक्रममा गजल वाचनका लागि उपस्थित भएका थिए । 

गजल यात्रा समूह २०१७ मा टेक्ससबाट गजलकारहरू- बासु पुष्पा अधिकारी, पवन लामिछाने र नेत्र आचार्य( नेत्र कौडिन्य) ले स्थापना गरेर गजल उत्सव -१ आयोजना गरेका थिए भने यो उत्सव २०१९ सम्म आई पुग्दा यो यात्राले तेश्रो श्रृंखला (गजल उत्सव -३ )मनाउन सफल भएको छ।

गजल उत्सव -३ मा गजलकारहरूलाई मतला, काफिया, रदीफ र मकता गरी ४ भागमा विभाजन गरिएको थियो। करिब डेढ़ सय दर्शक,गजलकारको शानदार उपस्थिति रहेको उक्त कार्यक्रममा स्थानीय गजलकारहरूको व्यवस्थापन प्रशंसनीय थियो। एयरपोर्टमा आईपुगेका र फर्कने सबै गजलकारलाई स्थानीयहरूले पिकअप ड्रप, खाना र बासको व्यवस्था गरेर नेपाली गजल उत्थानमा सक्रिय सहयोग गरेका थिए। 

कार्यक्रमको शुरूवात कार्यशाला गोष्ठीबाट गरिएको थियो। गोष्ठीमा गजल यात्राका सँस्थापकहरूले एउटा एप्स बनाएका थिए, जसमा तपाईं बहर/छन्दमा, स्वनिर्मित लय, लय निरपेक्ष या सबै के मा गजल लेख्न हुन्छ ? मुसलसल या गैर मुसलसल गजलमध्ये कस्तो गजल लेख्न रूचाउनु हुन्छ ? भन्ने जस्ता प्रश्नहरूको जवाफ एप्समै लिएर मत सर्वेक्षण गरिएको तथा गजल संरचना, हालका गजल विकास तथा बहरे गजल र गैर बहरे गजलका विषयमा उपस्थित गजलकारहरूमा छलफल एवम् ज्ञानको आदान-प्रदान  गराईएको थियो।

सो उत्सवमा गजलकारहरू आनन्द श्रेष्ठ, पवन लामिछाने, दु:खी अतित, पूर्ण नर्जली, सुरेश वाग्ले, पूजा बागिश, राज बराल, सविन शर्मा,पुरानाघरे, सौरभ तिम्सिना,रोहित राना, डिल्लु चौलागाईं, अमृत लामिछाने,अजित राई, धर्मेन्द्र तिम्सिना, सतिश त्रिपाठी, भागवद बॉस्तोला, सुजन माझी, उत्तम साम्पाङ्ग, बिक्न दादा, पातलो अन्तरे, कृष्ण कुसुम, विकु दवाडी, केशव असफल, भक्त घिमिरे,नेत्र आचार्य, खेम रिजाल, सुशील रेग्मी, यदुनाथ अधिकारी, नरेश गौतम, केशव न्यौपाने, गोवर्द्धन पूजा, सरूँ काली,पदम विश्वकर्मा, मदन दुलाल, बासुपुष्पा अधिकारी, मणी गौतम, अविनाश भट्टराई एक्स्ट्रा, वैरागी माईला, अरूण तामाङ्ग, चरण बजगाईं लगायतले आफ्ना २-२ वटा गजल वाचन गरेका थिए भने गजल गायक केशव पौडेल लगायतका गायकहरूले विभिन्न गजलकारका गजल गाएर कार्यक्रमलाई थप रोचक बनाएका थिए। 

आगामी गजल उत्सव-४ कुन राज्यमा गर्ने भन्ने विषयमा  ‘गजल यात्रा’ समूहले अबको केही समयको अन्तरालमा सार्वजनिक गर्नेछ।