काठमाडौं । सगरमाथाको उचाई नेपालले मापन गरिरहेको छ । सगरमाथा शिखरसम्मै टोली पठाएर नेपालले सगरमाथाको उचाई मापन गरेको हो ।

अहिले उक्त काम अन्तिम चरणमा पुगेको छ । सगरमाथाको नयाँ उचाई नेपाल र चीन दुबै मुलुकले संयुक्त रुपमा गर्ने सहमति गरेका छन् ।

नेपाल भ्रमणमा सकेर आइतबार मात्र स्वदेश फर्किएका चिनियाँ राष्ट्रपति र नेपालबीच भएको सहमतिमा उक्त विषय उल्लेख छ ।

सगरमाथा नेपाल र चीनबीच सीमा छुट्याउने विन्दु समेत हो । यद्दपी सगरमाथाको चुचुरो भने नेपालमा पर्छ ।

सहमति अनुसार नेपाल र चीनले संयुक्त रुपमा सगरमाथाको उचाई घोषणा गर्ने भएका छन् । सगरमाथाको उचाईमा चीनले समेत साथ दिँदा विश्वव्यापी मान्यता पाउन सहज हुने विश्वास नेपालको रहेको छ ।

चिनियाँ राष्ट्रपति सी जिनपिङको नेपाल भ्रमणको अन्तिममा जारी १४ बुँदे संयुक्त वक्तव्यमा सगरमाथालाई नेपाल र चीन मित्रताको प्रतीक भएको स्वीकार गरिएको छ।

जलवायु परिर्वतन र पर्यावरणको रक्षाका लागि दुई देशले सहकार्य गर्ने पनि संयुक्त वक्तव्यमा उल्लेख छ।

सगरमाथामा नेपाल र चीन दुबै तर्फबाट आरोहण गर्न सक्ने सुविधा रहेको छ । दुबै मुलुकको पर्यटन विकासका लागि यो सम्पदा महत्वपूर्ण सावित हुँदै आएको छ ।