काठमाडौं । रानीपोखरीस्थित बालगोपालेश्वर मन्दिर एक ऐतिहासिक विषेशताका कारण चर्चित छ । यो मन्दिर हरेक वर्ष केवल भाइटिकाका दिन मात्र सर्वसाधारणको लागि खुल्ने गर्छ ।

तर, यसरी खुल्न छाडेको पनि ५ वर्ष पुगेको छ । वैशाख २०७२ को भूकम्पले भत्किएको रानी पोखरी र बालगोपालेवर मन्दिरको पुनर्निर्माणको काम नसकिएपछि यस वर्ष पनि भाइटिकामा यो मन्दिर नखुल्ने भएको हो ।

यस मन्दिरमा दाजुभाई नहुने दिदिबहिनी र दिदिबहिनी नहुने दाजुभाईले एक अर्काको हातबाट टिका ग्रहण गरी निधार खाली नराख्ने प्रचलन रहेको छ ।

रानी पोखरी र बालगोपालेश्वर मन्दिर शिलान्यास भएको ५ वर्ष पुगिसकेको छ । तर, निर्माण सामग्रीमा विवाद, ऐतिहासिक सम्पदा भएकाले यसको डिजाइनमा देखिने विवादजस्ता अनेक कारणले यसको पुनर्निर्माणले गति लिन सकेको छैन ।