बारा । भारतको मोतिहारीबाट अब चितवनसम्म पाइपलाइनबाट ग्यास आउने भएको छ । मोतीहारी–चितवन पाइपलाइन र अमलेखगञ्ज–चितवन इन्धन पाइपलाइनको काम शुरु गरिएको छ ।

शनिबार उद्योग वाणिज्य तथा आपूर्तिमन्त्री मातृका यादवले बाराको अमलेखगञ्जस्थित पाइपलाइन निर्माणस्थलमा सङ्केत पिल्लर गाड्दै यस आयोजनाको शुरुवात भएको घोषणा गरे ।
मोतिहारी–चितवन ग्यास पाइपलाइनसँगै अमलेखगञ्ज–चितवनपेट्रोलियम पाइपलाइन समेत बिस्तार हुने उक्त अवसरमा जानकारी दिइयो ।

अमलेखगञ्जबाट चितवनको लोथरसम्म करीब ६२ किलोमिटर लामो पाइपलाइन विस्तारको तयारी गरिएको हो ।

अमलेखगञ्ज–चितवन पेट्रोलियम पाइपलाइन विस्तारको लागत ५ अर्ब ६७ करोड लाग्ने र पेट्रोलियम पदार्थ भण्डारण आयोजनाको लागत ४ अर्ब १९ करोड लाग्ने नेपाल आयल निगमले जनाएको छ ।