काठमाडौं । सरकारले सात वटै प्रदेशका प्रमुखलाई एकै साथ हटाएको छ । शेरबहादुर देउवा नेतृत्वको सरकारले नियुक्त गरेका सात वटै प्रदेशका प्रमुखलाई हटाउने निर्णय गरी सरकारले राष्ट्रपति समक्ष सिफारिस गरेको थियो ।

सरकारको सिफारिसमा राष्ट्रपति विद्यादेवी भण्डारीले प्रदेश प्रमुखलाई पदमुक्त गरेको राष्ट्रपति कार्यालयले जनाएको छ । मन्त्रिपरिषद्को आइतबार बिहान बसेको बैठकले प्रदेश प्रमुख हटाउने निर्णय गरेको थियो ।
सरकारले प्रदेश १ का प्रा.डा. गोविन्दबहादुर तुम्बाहाङ, २ का रत्नेश्वरलाल कायश्थ, ३ की अनुराधा कोइराला, गण्डकी प्रदेशका प्रमुख बाबुराम कुँवर, प्रदेश ५ का उमाकान्त झा, कर्णाली प्रदेशका दुर्गाकेशर खनाल र सुदूरपश्चिम प्रदेशका प्रदेश प्रमुख मोहनराज मल्ललाई पदमुक्त बनाएको हो ।

अब सोमबार नयाँ प्रदेश प्रमुख नियुक्ती गर्ने तयारी सरकारले गरेको छ । ३ माघ २०७४ मा प्रदेश प्रमुखहरु नियुक्त भएका थिए ।

केपी ओली नेतृत्वमा नयाँ सरकार गठन भएपछि सरकारले चुनावी सरकारले नियुक्त गरेका सबै नियुक्ती खारेज गर्ने निर्ण गरेको थियो । तर, अदालतको थमौतीले निर्णय कार्यान्वयन हुने सकेको थिएन ।