न्युयोर्क

भारत सरकारले हालै जारी गरेको भनिएको नयाँ राजनैतिक नक्सामा नेपाली भुभाग कालापानी, लिपुलेक र लिम्पियाधुरालाई समेत एकतर्फी रुपमा समाबेश गर्दै सार्वजनिक गरेपछि भारत सरकारको उक्त कार्यको नेपाल भित्र र प्रबासमा समेत बिरोधका स्वरहरु ब्यापक हुन थालेका छन् ।देश भित्र र बाहिरबाट बिरोध ब्यापक हुँदै गर्दा  अमेरिकास्थित गैर आवसीय नेपाली संघका नवनिर्वाचित रिजनल कोअर्डिनेटर (आर सि ) राजन त्रिपाठीले पनि एक बिज्ञप्ती जारी गर्दै बिरोध जनाएका छन् । त्रिपाठीले भारतको उक्त कदमलाई गलत भन्दै उक्त कदम नेपालीका निम्ति किमार्थ स्विकार्य नहुने कुरा बताएका छन् ।  

आर सि त्रिपाठीद्वारा जारी बिज्ञप्तीमा भनिएको छ “छिमेकी देशमा देखिने यस्ता सीमा सम्बन्धी समस्याको समाधान दुई पक्षका बीच छलफल र सहमतिमा कुटनीतिक तबरले बैज्ञानिक ढंगबाट निराकरण गर्नुको सट्टा ऐतिहासिक दस्तावेज र प्रमाणलाई एकातिर पन्छाई अगाडी बढ्न खोज्नु भारत सरकारको बल मिच्याई र गलत प्रवृत्ति हो । नेपाल आमाको छात्तिमा जबरजस्त कुल्चिने चेष्टाका बिरुद्ध संसारभर छरिएर बसोबास गरेका नेपालीहरुले एकढिक्का भई लड्नेछन्” ।

बिज्ञप्तीमा नेपालको सार्वभौमिकता र भौगोलिक अखण्डता जस्तो अति संवेदनसिल बिषयमा गैर आवासीय नेपालीहरु सधै नेपाल र नेपाली जनताको साथमा रहने बचनबद्दता समेत ब्यक्त गरिएको छ ।  

भारत सरकारले आफ्नो कदमलाई  त्रुटी र महाभुल ठान्दै तत्काल सच्याई दुई देशको छिमेकीका बीच सुमधुर सम्बन्ध कायम राख्न तल्काल कदम चाल्न समेत बिज्ञप्तीमा अनुरोध गरिएको छ । 

हालै गैर आवासिय नेपाली सँघ अन्तरराष्ट्रिय समन्वय परिषदको तर्फबाट समेत  भारतको  कदमको बिरोध गर्दै अध्यक्ष कुमार पन्तले नेपालको सिमाना रक्षाको लागि गैर आवासीय नेपालीहरु सधैं भरी नेपाल सरकारको साथमा रहने प्रतिबद्दता ब्यत गर्दै एक बिज्ञप्ती जारी गरिएको थियो । अमेरिकाज क्षेत्रको तर्फबाट रिजनल कोअर्डिनेटर  राजन त्रिपाठीले भारत सरकारको उक्त बिबाद्स्पद् कार्यको बिरोध गर्दै बिज्ञप्ती जारी गर्दा अध्यक्ष सुनिल शाह नेतृत्वको अमेरिकी एन आर एन भने भारतको बिबादास्पद नक्साको बारेमा मौन छ ।