काठमाडौं । काठमाडौं जिल्ला अदालतले उद्योगपछि पद्य ज्योतीका नाममा पक्राउ पूर्जी जारी गरेको छ । उनी यसअघि पक्राउ परेका व्यवसायी रुप ज्योतीका दाई हुन् ।

पद्यलाई पनि रुप ज्योती कै प्रकरणमा पक्राउ पूर्जी जारी भएको हो । ल्यान्डमार्क जग्गा लेनदेन प्रकरणका कारण पछिल्लो समय ज्योती परिवारलाई श्रृंखलावद्ध रुपमा पक्राउ गरिएको छ ।

रुप ज्योतीसागै उनकी छोरी सूरुचीलाई समेत प्रहरीले हिरासतमा राखेको छ । ज्योती ग्रुपका अध्यक्ष पद्म ज्योति नेपाल उद्योग वाणिज्य महासंघका पूर्वअध्यक्ष हुन्। रूप ज्योति भने २१ कात्तिकमा त्रिभुवन विमानस्थलबाट पक्राउ परेका थिए ।

काठमाडौं महानगरपालिका, बाँसबारीस्थित ल्यान्डमार्क डेभलपर्स प्रा.लि. र विजेन्द्रकृष्ण मल्लबीच २०७१ सालमा घर निर्माणसम्बन्धी सम्झौतापछि उत्पन्न लेनदेनको विवादले नेपालकै एक प्रतिष्ठित व्यापारिक घराना मुछिएका छन् ।

सम्झौता अनुसार ६ आना ३ दाम २.१६ पैसा जग्गामा घर बनाएर मल्ललाई हस्तान्तरण गर्ने शर्त थियो । सोही सम्झौता अनुसार मल्लले ल्यान्डमार्कलाई अग्रिम एक करोड ३६ लाख रुपैयाँ भुक्तानी दिएका थिए।

घर निर्माण पछि हस्तान्तरण गर्दा मल्लले २ करोड १४ लाख १९ हजार ७५० रुपैयाँ बुझाउनुपर्ने गरी सम्झौता भएको थियो। रूप ज्योतिले उक्त जग्गामा घर नबनाएको र आफ्नो पैसा खाएको विवादमा उजुरी दिएपछि ज्योती पक्राउ परेका हुन् ।