काठमाडौं । चलचित्र विकास बोर्डका अध्यक्ष केशव भट्टराइको निधन भएको छ । आइतबार राति १० बजेर २० मिनेटमा भट्टराईको निधन भएको पारिवारिक स्रोतले जनाएको छ ।

साँझ स्वास्थ्यमा समस्या आएपछि उनलाई तत्काल ओम अस्पताल लगिएको थियो । अस्पताल पुर्याउनासाथ डाक्टरले उनलाई मृत घोषणा गरेका थिए ।

मृत्युको कारण पोष्टमार्टमपछि मात्र खुल्ने अस्पतालले जनाएको छ । हृदयघात भएको आंशका छ । उनी निर्माता तथा कलाकारसमेत हुन् ।

उनी गत पछिल्लो १ वर्षयता भने संघको अध्यक्षका रुपमा सक्रिय थिए । भट्टराइको पछिल्लो चलचित्र ‘यात्रा’ हो ।

बक्स अफिसमा कमाउ हुने चलचित्र निर्माताका रुपमा उनलाई चिचिन्थ्यो । उनी विगत ३ दशकयता चलचित्र क्षेत्रमा सक्रिय छन् ।

उनी अभिनेतासमेत हुन् । ‘आफ्नो मान्छे, पाहुना, कर्मयोद्धा, देवरबाबु, छोडी गए पाप लाग्ला, सो सिम्पल’जस्ता चर्चित चलचित्र उनले बनाएका हुन् ।

उनको आजै दाहसंस्कार गर्ने तयारी रहेको छ ।