काठमाडौं । धावनमार्ग र ट्याक्सी वे जिर्णाद्धारको काम सकिएसँगै आजबाट त्रिभुवन विमानस्थ्ल २१ घण्टा संचालनमा आएको छ ।

यसअघि दैनिक ७ घण्टा बन्द भएको विमानस्थल अब मात्र दैनिक ३ घण्टा बन्द हुने भएको छ । जिर्णोद्धारको जिम्मेवारी पाएको कम्पनीले नेपाल नागरिक उड्डयन प्राधिकरणलाई आयोजना हस्तान्तरण गरेको छ ।

यससँगै अब विमानस्थल २१ घण्टा संचालनका लागि योग्य भएको विमानस्थल कार्यालयले उल्लेख गरेको छ । नेपाल भ्रमण वर्षको मुखमा विमानस्थलमा निर्माणका गतिविधि धमाधम भइरहेका छन् ।

विमानस्थललाई बुटिक विमानस्थलमा समेत परिणत गर्ने काम भइरहेको छ । त्यसअगाडी धावनमार्ग र ट्याक्सीवेको काम सकिएको हो ।

यहाँ करीव ४० वर्षपछि धावनमार्गको पीच उप्काएर नयाँ राखिएको हो । अब धावनमार्गको क्षमता बढेको छ ।

जसले गर्दा संसारभर उड्ने गह्रौं प्रकृतिका जहाज पनि त्रिभुवन विमानस्थलमा आएर अवतरण गर्न सक्ने भएका छन् ।

त्रिभुवन विमानस्थलबाट अहिले दैनिक ७० हारहारी अन्तर्राष्ट्रिय र ४ सय हाराहारी आन्तरिक उडान हुने गरेका छन् । यो नेपालको एक मात्र अन्तर्राष्ट्रिय विमानस्थल हो ।