काठमाडौं । सरकारले बाराको निजगढमा निर्माणको योजना बनाएको राष्ट्रिय गौरवको आयोजना निजगढ अन्तरराष्ट्रिय विमानस्थल आयोजना कुनै पनि बाहनामा प्रभावित हुन नहुने स्थानीय जनप्रतिनिधिले बताएका छन ।

शनिबार राजधानीमा सरोकारवालाको बैठक बसेको थियो । जहाँ निजगढ मुलुकको आर्थिक भविश्यसँग गासिएको परियोजना रहेको भन्दै यसको निर्माण कुनै पनि बाहनामा प्रभावित बन्न नहुनेमा सरोकारवाला एक मत भएका छन् ।

पछिल्लो समय वातावरणीय मुद्दा उचालेर यस आयोजनालाई प्रभावित बनाउने खेल भइरहेको छ । रुख काट्न नहुने भन्दै मुद्दा समेत सर्वोच्चमा विचाराधिन अवस्थामा छ ।

यसै मेसोमा सरोकारवालाले भने कुनै पनि हालतमा विमानस्थल बन्नुर्ने अडान राखेका छन् ।

संसदीय सुनुवाई समितिका सभापति लक्ष्मणलाल कर्णले विमानस्थलको काम अघि बढेपछि अहिले सतहमा आएका धेरै विवाद क्रमशः हराउँदै जाने उल्लेख गरे ।

जति लम्बियो त्यति विवाद पनि बढ्दै जाने भएकाले विमानस्थल निर्माण कार्य छिटो अघि बढाउन उनले आग्रह गरे ।

अर्थसमितिका सभापति कृष्णप्रसाद दाहालले देशकै ठूलो र महत्वपूर्ण आयोजनामा अलमल गरेर बस्न नहुने उल्लेख गरे ।

उद्योग तथा वाणिज्य र श्रम तथा उपभोक्ता हित समितिका सभापति विमलप्रसाद श्रीवास्तवले समेत आयोजनामा अलमल गर्ने अवस्था नरहेको उल्लेख गरे ।

पूर्वमन्त्री उमाकान्त चौधरीले यो आयोजना बाहनाबाजी गरेर पछि धकेल्न नपाइने उल्लेख गरे ।

पूर्वमन्त्री फरमुला मन्सुरले अर्थतन्त्रमै प्रभाव पर्ने आयोजना भएकाले अलमल नगर्न सरकारलाई सुझाव दिए ।

कार्यक्रममा नेपाल नागरिक उड्डयन प्राधिकरणका महानिर्देशक राजन पोखरेलले पहिलो चरणमा १९ सय हेक्टरमा सुविधा सम्पन्न विमानस्थल बन्ने र त्यसका लागि थोरै रुख काटेमात्र पुग्ने प्रस्तुती दिएका थिए ।