काठमाडौं । नेकपा (क्रान्तिकारी माओवादी) का उपाध्यक्ष सीपी गजुरेललाई प्रहरीले नियन्त्रणमा लिएको छ ।

अपरान्ह सिंहदरबार प्रवेश गर्ने क्रममा पक्राउ परेका उनीसहित १५ जना नेता, कार्यक्रतालाई प्रहरीले साँझ छाडेको छ ।

सिंहदरवारमा हुलदंगा गरी प्रहरीमाथि ढुंगामुडा गर्न उत्रिएपछि प्रहरीले उनीहरुलाई पक्राउ गरेको हो ।

प्रहरीका अनुसार गजुरेलले सीमा अतिक्रणका विषयमा उपप्रधानमन्त्री तथा रक्षामन्त्री ईश्वर पोखरेललाई ज्ञापनपत्र बुझाउन समय लिएका थिए । पोखरेलले समय पनि दिएका थिए ।

तर, नेता गजुरेल दलबलसहित सिंहदरबार पस्न खोजेपछि प्रहरीले रोकेको थियो ।

त्यसपछि भने प्रहरी र माओवादी कार्यक्रताबीच झडपको स्थिति उत्पन्न भएको थियो ।

प्रहरीमाथि भएको ढुंगामुडामा दुई जना प्रहरी घाइते भएको महानगरीय प्रहरी कार्यालयले जनाएको छ ।

पक्राउ पछि माओवादी नेताहरुलाई प्रहरीले प्रदर्शनमार्गस्थित पुलिस क्लबमा राखेको थियो । उनीहरु साँझ नै रिहा भएका छन् ।