काठमाडौं । वार्षिक २० लाख पर्यटक भित्राउने लक्ष्यसहित नेपालले सन् २०२० मा नेपाल भ्रमण वर्ष मनाउँदैछ । यसको तयारी पुरा भएको आयोजक नेपाल सरकारले जनाएको छ ।

संस्कृति, पर्यटन तथा नागरिक उड्डयन मन्त्रालय, भ्रमण वर्ष सचिवालय र नेपाल पर्यटन बोर्डले सोमबार राजधानीमा एक कार्यक्रम आयोजना गरी भ्रमण वर्षको तयारी पुरा भएको जानकारी गराएका छन् ।

पर्यटन मन्त्री योगेश भट्टराईले ३१ डिसेम्बर र १ जनवरीका दिन दिपावली गर्न सबै नेपालीसँग आग्रह गरे ।

अहिले वार्षिक झण्डै १२ लाख पर्यटक भित्रिरहेका छन् । यो संख्यालनई बढाएर २० लाख पुर्याउने चूनौतिका बीच सरकारले भ्रमण वर्ष घोषणा गरेको छ ।

संख्यासँगै पर्यटन आयसमेत बढाउनु सरकारका लागि चूनौतिको विषय हो । यस अवस्थामा सरकारले कसरी अभियानलाई सफल बनाउला, यो भने हेर्नै पर्ने विषय हो ।

भ्रमण वर्षका दौरान ८५ मुलुकमा नेपालको अभियान पुग्नेछ । गैरआवासीय नेपालीको संजाल रहेको क्षेत्रमा कार्यक्रम केन्द्रित गर्ने योजना सरकारको छ ।

ती मुलुकमा गैरआवासीय नेपाली संघकै नेतृत्वमा कार्यक्रम आयोजना हुने भएका छन् ।