काठमाडौं । सरकारले उखु किसानको वक्यौता तिर्न चिनि मिलका मालिकहरुलाई अल्टिमेटम दिएको छ ।

किसानको पैसा तिर्न बाँकी चिनी मिल सञ्चालकले माघ पहिलो सातासम्म सबै पैसा तिरिसक्नु पर्ने गरी सरकारले अल्टिमेटम तोकिदिएको हो ।

आफ्नो पैसा माग गर्दै काठमाडौं आएका उखु किसान र उद्योग, वाणिज्य तथा आपूर्ति मन्त्री लेखराज भट्टबीच भएको वार्तामा सरकारले उक्त निर्देशन दिएको हो ।

माघको पहिलो सातासम्म सबै पैसा तिर्न मिल सञ्चालकलाई निर्देशन दिइएको मन्त्रालयले जनाएको छ । पुस २५ भित्र ८० प्रतिशत रकम तिरेर बाँकि रकम माघ पहिलो सातासम्म चुक्ता गर्न निर्देशन दिइएको छ ।

सरकारले उखु मिल संचालकलाई पक्राउ गर्ने तयारी गरेपछि केही मिल संचालक भने सरकारको सम्पर्कमा आएर पैसा तिर्ने बताइसकेका छन् । त्यसमध्ये एक महालक्ष्मी सुगर मिल्स हो ।

यस उद्योगले पुस २५ सम्म सबै पैसा तिर्ने प्रतिवद्धता जनाएको छ । सरकारको अल्टिमेटममा पनि पैसा ननिरे कडा कारवाही गर्ने चेतावनी दिएको छ ।

मिलले उखु किसानको उखु पेलेर चिनी बनाएर बेचिसक्दा पनि किसानको मूल्य नतिरेपछि कृषक समस्यामा रहेका छन् ।

उनीहरु उद्योगबाट पैसा दिलाइदिन माग गर्दै काठमाडौं आएका थिए ।