काठमाडौं । दुई साता अघि देशभर चिसो ल्याउने गरी आएको पश्चिमी वायुको प्रभावलाई दोहोर्याउने गरी चिसो बढ्ने भएको छ ।

जल तथा मौसम विज्ञान विभागका अनुसार आजबाट तीन दिनसम्म मौसम प्रभावित हुनेछ ।

देशभर मौसम बदली भइ केही स्थानमा वर्षा र हिमपातको सम्भावना रहेका विभागले जनाएको छ । काठमाडौं उपत्यकासहित देशभर आकासमा बादल लागेको छ । घाम छोपिएको छ ।

त्यसकारण धेरैजसो स्थानमा चिसो हुने विभागको भनाई छ । सोही कारण अधिकांश स्थानमा पानी पर्ने सम्भावना समेत देखिएको छ ।

यो क्रम शक्रबार रातिसम्मै रहने छ । उच्च पहाडी तथा हिमाली भागमा मध्यमदेखि भारी हिमपात र पहाडी तथा तराईका केही स्थानहरुमा हल्कादेखि मध्यम वर्षाको सम्भावना छ ।

शनिबार र आइतबार पनि यस्तै हुने विभागले जनाएको छ । शनिबारबाट क्रमिक सुधारको सम्भावना छ । काठमाडौंमा भने बिहीबार दिउँसो पनि वर्षा भएको थियो ।