काठमाडौं । देशभर सडक निर्माणले गति लिएको छ । यसै सन्दर्भमा चालु आर्थिक वर्षको पहिलो चार महिनाको अवधिमा देशभर ४५ वटा पक्की पुलको निर्माण सकिएको छ ।
सडक विभागको तथ्यांक अनुसार पहिलो चौमासिक अवधि भित्रै ४५ वटा पुल निर्माण सम्पन्न भइसकेका छन् ।
चालु आर्थिक वर्षमा मात्र तीन सय पक्की पुलको निर्माण पुरा गरिसक्ने योजना रहेको छ । धेरै आयोजनाहरु बहुवर्षिय रहेका र विगतदेखि काम भइरहेका पुलहरु चालु आवको पहिलो चार महिना मै निर्माण सम्पन्न भएका हुन् ।
विभागका अनुसार अहिले देशभर १ हजार ४ सय ६७ वटा पुल निर्माणाधीन अवस्थामा छन् । सामान्यतया एउटा पुललाई अधिकतम तीन वर्षमा पुरा गर्ने गरी ठेक्का लगाइएको हुन्छ ।
सडक बिस्तारका क्रममा अहिले पक्की पुल निर्माणलाई पहिलो प्राथमिकता दिइएको छ । पछिल्लो समय बन्ने अधिकांश पुल दुई लेनका छन् ।
