नयाँ दिल्ली । भारतको नयाँदिल्लीस्थित जवाहरलाल नेहरु विश्वविद्यालय (जेएनयू)मा आइतबार एक अज्ञात समुहले आक्रमण गरेको छ ।

नकाबधारी समूहले विश्वविद्यालयका विद्यार्थीमाथि अन्धाधुन्ध आक्रमण गरेको भारतीय संचारमाध्यमले लेखेका छन् ।

आक्रमणबाट जेएनयू छात्र संघका अध्यक्ष आईसी घोषसहित डेढ दर्जन विद्यार्थी घाइते छन् ।

५० भन्दा बढीको संख्यामा आएका नकावधारीले विश्वविद्यालय हाता र छात्रावासमा समेत घुसेर आक्रमण गरेका थिए ।

उनीहरुले हातमा फलामे डण्डी र लठ्ठी समाएका थिए । प्रहरीले स्थिति नियन्त्रणमा रहेको बताएको छ ।

जेएनयूमा सुरक्षाकर्मी तैनाथ भएका छन् । आक्रमण लगत्तै विद्यार्थीले प्रदर्शन थालेका छन् । जनवरी १ तारिखदेखि विश्वविद्यालयमा शीतकालीन सत्र प्रारम्भ भएको छ ।

अहिले त्यहा विद्यार्थीहरुको रजिष्ट्रेशनको काम भइरहेको थियो ।

रजिष्ट्रेशनको समर्थन र विरोध गर्ने विद्यार्थीहरुबीच मतभेद भइरहेको समयमा अज्ञान समूहले आक्रमण गरेको हो ।

भारतीय गृहमन्त्री अमित शाहले घटनाको छानविन गर्ने आश्वासन दिएका छन् ।

विद्यार्थीले भने गृहमन्त्रीकै डिजाइनमा आक्रमण भएको आरोप लगाएका छन् । यहाँ पछिल्लो समय विद्यार्थीहरुबीच नै झडपको स्थिति आइरहेको छ ।