काठमाडौं । बेल्जियमकी राजकुमारी एस्ट्रिड नेपाल भ्रमणमा आउँदैछिन् । परराष्ट्र मन्त्रालयका अनुसार एस्ट्रिड आगामी आइतबार (५ माघ)मा नेपाल आउनेछिन । उनी नेपालमा एक साता बस्ने छिन् ।

नेपाल बसाईका अवसरमा उनले राष्ट्रपति विद्यादेवी भण्डारीसहित उपप्रधानमन्त्री तथा रक्षामन्त्री इश्वर पोखरेल, परराष्ट्रमन्त्री प्रदिप कुमार ज्ञवाली र स्वास्थ तथा जनसंख्यामन्त्री भानुभक्त ढकालसँग भेट्ने कार्यक्रम तय भएको मन्त्रालयले जनाएको छ ।

राजकुमारी एस्ट्रिड कैलाली, नवलपरासी र चितवनको भ्रमणमा समेत निस्कने भएकी छिन् ।

कैलाली भ्रमणका सिलसिलामा उनले क्षयरोग सेन्टरको उद्घाटन गर्नेछिन् । त्यहाँ रहेका बिरामीसँग समेत उनले भलाकुसारी गर्ने भएकी छिन् ।

उनी नवलपरासीस्थित मिडपोइन्ट अस्पतालमा क्षयरोग र कुष्ठरोगका बिरामीसँग भेट्ने कार्यक्रम राखिएको छ । उ

नी अध्यक्ष रहेको बेल्जियमको गैरसरकारी संस्था डमियन फाउन्डेसनले यस अस्पतालमा सहयोग गरिरहेको छ । ‌

यस भ्रमणले नेपाल र बेल्जियमबीच दुईपक्षीय सम्बन्ध अझ प्रगाढ हुने परराष्ट्र मन्त्रालयको भनाई रहेको छ ।

नेपाल भमण वर्ष चलिरहँदा बेल्जियमबाट भएको यस उच्चस्तरीय भ्रमणले यूरोपका पर्यटक आगमनमा समेत सकारात्मक भूमिका खेल्नेछ ।