पोखरा । गण्डकी प्रदेश सांसद राजिब गुरुङ ‘दीपक मनाङे’ले अखिल नेपाल फुटबल संघ (एन्फा) कास्कीका अध्यक्ष मिलन गुरुङमाथि हातपात गरेका छन्।

पोखराको लेखनाथस्थित भण्डारढिकमा मंगलबारदेखि शुरु भएको मुख्यमन्त्री कप फुटबल प्रतियोगिता उद्घाटनपूर्व विवाद उत्पन्न भएका थियो । सोहीक्रममा मनाङेले गुरुङमाथि हातपात गरेका हुन्।

मनाङेले मुक्का र लात्ती हानेको गुरुङले बताएका छन् । गुरुङका अनुसार प्रतियोगितामा मनाङबाट एक टोली सहभागी भएको छ ।

उक्त टोलीलाई ५ दिनदेखिको होटल खर्च मनाङेले मागेका थिए। खर्च दिन नमिल्ने बताएपछि आफूमाथि हातपात भएको उनको भनाई रहेको छ ।

उनले बुधबार प्रहरीमा उजुरी दिने बताएका छन् । स्थानीय संचारमाध्यमहरुका अनुसार मनाङेले समेत झापड हानेको स्वीकार गरेका छन् ।