काठमाडौं । नेपालले सन् २०२१ मा भारतमा आयोजना हुने टी-२० विश्वकप ग्लोबल छनोट खेल्न पाउने भएको छ ।
अन्तर्राष्ट्रिय क्रिकेट काउन्सिल (आइसीसी)ले टी-२० वरीयतामा १२ औँ स्थानमा रहेको नेपाललाई सोझै ग्लोबल छनोट खेल्न पाउने अधिकार दिएको छ । यसले विश्वकपमा नेपालको सहभागिताको सम्भावना समेत बढाइदिएको छ ।
१६ टिमले विश्वकप खेल्नेछन् । त्यसमध्ये आइसीसी च्याम्पियनस ट्रफी खेल्ने आठ टिम सोझै विश्वकप पुग्ने प्रावधान रहेको छ ।
अरु टिमले भने क्षेत्रीय छनोट प्रक्रिया पार गरी आउनुपर्छ । त्यसका लागि नेपाललाई समेत छनोट गरिएको आइसीसीले जनाएको छ ।
नेपालले सन् २०१४ को विश्वकप खेलेयता विश्वकपमा स्थान बनाउन सकेको छैन । नेपाल वानडे मान्यता प्राप्त मुलुक हो ।
