नुवाकोट । नुवाकोटस्थित दुप्चेश्वर गाउँपालिका १ घ्याङफेदीबाट हराएका दुई युवाको शव पेला परेको छ ।

उनीहरुको शव हिउँले पुरेको अवस्थामा सोमबार फेला परेको हो । उनीहरु गोसाइँकुण्डको पदयात्रामा निस्किएका थिए ।

सिन्धुपाल्चोक जिल्ला मेलम्चीका २१ वर्षीय वाङदेल शेर्पा र काठमाडौं गोकर्णेश्वर नगरपालिका ८ का १९ वर्षीय जापान तामाङ ३ माघदेखि हराइरहेका थिए ।

उनीहरु हराएपछि खोजीमा टोली खटिएको थियो । गाउँपालिकाले नै उनीहरुको खोजीका लागि टोली खटाएको थियो ।

दुप्चेश्वर गाउँपालिकाको फेदीको खोँचमा हिउँले पुरिएको अवस्थामा उनीहरुको शव मिलेको हो ।

गाउँपालिकाका अनुसार ४० मिटरको फरकमा दुबै जनाको शव फेला परेको थियो ।

दुई युवा गोसाइकुण्ड क्षेत्रको पदयात्रामा १ माघमा सिन्धुपाल्चोकबाट निस्किएका थिए । ३ माघबाट भने हराएका हुन् ।