काठमाडौं । सत्तारुढ नेपाल कम्युनिष्ट पार्टी (नेकपा)ले एमसीसीबारे अध्ययन गर्न समिति गठन गरेको छ । पूर्वप्रधानमन्त्री तथा सचिवालय सदस्य झलनाथ खनालको नेतृत्वमा समिति गठन गरिएको हो ।

आइतबार प्रधानमन्त्री निवास बालुवाटारमा नेकपाको सचिवालय बैठक बसेको थियो । उक्त बैठकले खनाल नेतृत्वमा स्थायी कमिटी सदस्य भीम रावल र प्रदीपकुमार ज्ञवाली रहेको समिति गठन गरेको हो।

यो समितिले एमसिसीबारे अध्ययन गरी दश दिनभित्र सचिवालयलाई प्रतिवेदन बुझाउने भएको छ । समिति गठन भएको बारे आइतबार केन्द्रीय कमिटी बैठकमा समेत जानकारी गराएको छ ।

अध्यक्ष प्रचण्डले उक्त जानकारी गराएका थिए । रावल एमसीसीलाई देशघाती भन्दै स्वीकार गर्न नहुने मत राख्ने नेता हुन् ।

एमसीसीबारे नेकपाभित्रै विवाद छ । विपक्षी काग्रेसले भने यो छिटो कार्यान्वयन गर्नुपर्ने पक्षमा निरन्तर पहल गरिरहेको छ ।