काठमाडौं । कोरोना भाइरसको संक्रमणबाट चीनमा एक अमेरिकी नागरिकको ज्यान गएको छ ।

चीनको हुबेई प्रान्तस्थित कोरोना प्रभावित शहर वुहानमा अमेरिकी नागरिकको मृत्यु भएको समाचार संस्थाहरुले उल्लेख गरेका छन् ।

आइतबार बेइजिङस्थित अमेरिकी राजदूतावासले ती अमेरिकी नागरिकको मृत्यु भएको पुष्टी गरेको हो ।

६० वर्षिय अमेरिकी नागरिकको मृत्यु भएको दूतावासले पुष्टी गरेको हो ।

कोरोनाको संक्रमणबाट चीनमा पहिलो गैर–चिनियाँको मृत्यु भएको बताइएको छ । यस भाइरसले हालसम्म ८१३ जनाको ज्यान लिइसकेको छ ।

मर्नेहरु धेरैजसो वुहान र यस आसपासको शहरमा बसोबास गरिरहेका व्यक्ति हुन् ।

चीन बाहिर फिलिपिन्समा एक जनाले ज्यान गुमाइसकेका छन् । यो भाइरसको संक्रमण २७ मुलुकमा पुगिसकेको छ ।

फ्रान्समा पाँच बेलायती नागरिकमा यसको संक्रमण भेटिएको छ ।

नेपालमा एक जनामा यो रोगको संक्रमण भेटिएको भएपनि उनी निको भएर घर फर्किसकेका छन् । यतिबेला नेपाल कोरोना मुक्त क्षेत्र बनेको छ ।