काठमाडौं  ।   हिमालयन ट्राभल मार्ट बिहीबारदेखि काठमाडौंमा शुरु भएको छ । मार्टमा नेपालसहित ४१ देशका ७ सय पर्यटन व्यवसायी भेला भएका छन् । मार्टको तेस्रो संस्करण अहिले संचालन हुँदैछ ।

हिमालयन ट्राभल मार्ट सन् २०१७ देखि नेपालमा शुरु भएको हो । अन्तरदेशीय पर्यटन प्रवर्द्धन तथा व्यापार विस्तारमा मेला सहयोगी हुने पाटा नेपाल च्याप्टरका अध्यक्ष शुनिल शाक्यले जानकारी दिए ।

नेपाललाई हिमालयन प्रवेशद्वारका रुपमा परिचति गराउँदै नेपालको पर्यटन प्रवद्र्धन गर्ने उद्देश्यका साथ मार्ट आयोजना  उनले बताए । मार्टको बिहीबार साँझ प्रधानमन्त्री केपी शर्मा ओलीले उद्घाटन गरे ।

तीन दिनसम्म चल्ने मार्टले नेपालको पर्यटन ब्राण्डमा उल्लेख्य भूमिका खेल्ने नेपाल पर्यटन बौर्डका सीइओ दीपकराज जोशीले बताए ।
सन् २०१८ मा पर्यटक आगमन वृद्धिदरका दृष्टिबाट नेपाल संसारमै अग्रणी मुलुक रहेको भन्दै जोशीले यस मार्टले नेपाललाई विश्वभर चिनाउन महत्वपूर्ण भूमिका खेल्ने बताए ।

मार्टमा व्यवसायीहरुबीच विजनेश टू विजनेश भेट हुनेछ । जसका माध्यमबाट व्यवसायीले नेपालसहित हिमालयन क्षेत्रको पर्यटन प्याकेज बिक्रि गर्न सक्नेछन् ।

मार्टमा ३० मुलुकबाट विश्वव्यापी क्रेता कम्पनीले भाग लिएका छन् । ६ मुलुक(नेपाल, भारत, पाकिस्तान, चीन, भूटान र थाइल्याण्ड)बाट ५४ विक्रेता कम्पनी तथा संस्थाले आफ्ना प्याकेज बिक्रि गर्नेछन् ।