काठमाडौं । कोटेश्वरमा अधिक सवारी जाम हुँदा आवागमन प्रभावित बन्दै गएपछि ट्राफिक प्रहरीले लेन कार्यान्वयनमा नयाँ नियम ल्याएको छ ।

अब सूर्यविनायक–जडिबुटी सडक खण्डमा यात्रुबाहक तथा मालबाहक सवारी साधन र कम गतिमा गुड्ने सवारी साधनका लागि छुट्टै लेन हुने भएको छ ।

यी सवारी साधनले बायाँ लेनबाट मात्र सवारी साधन चलाउन पाउने भएका छन् ।

महानगरीय ट्राफिक प्रहरी महाशाखाले नयाँ लेनको नियम सार्वजनिक गरेको हो । अब दाहिने लेनबाट निजी तथा साना सवारीसाधन मात्रै गुडाउन पाइनेछ ।

यो प्रावधान १४ फागुनदेखि लागू हुने महानगरीय ट्राफिक प्रहरी महाशाखाले उल्लेख गरेको छ ।

उपत्यकाको सवारी आवागमनलाई सहज बनाउन प्रहरी उपरीक्षक जीवनकुमार श्रेष्ठको अध्यक्षतामा एक सुझाव समिति गठन गरिएको थियो ।

उक्त समितिले दिएको प्रतिवेदनका आधारमा महाशाखाले नयाँ नियम बनाउन लागेको हो । तिब्र गतिमा सवारी चलाउने र ट्राफिक जामका कारण यो सडक खण्ड असुरक्षित समेत बन्दै गएको छ ।