काठमाडौं । नेपाली कांग्रेसका सभापति शेरबहादुर देउवाले एक दर्जन विभागमा विभागीय प्रमुख तोकिदिएका छन् । उनले शनिबार १३ वटा विभागमा प्रमुख तोकेको पार्टीले जनाएको छ ।

यसअघि शुक्रबार वरिष्ठ नेता रामचन्द्र पौडेलले आफ्नो पक्षका नेताको नाम दिन अस्वीकार गरेका थिए । त्यसलगत्तै शनिबार देउवाले विभागमा प्रमुख तोकेका छन् ।

देउवाले संगठन विभाग प्रमुखमा गोपालमान श्रेष्ठलाई तोकेको छन् । प्रवक्ता विश्वप्रकाश शर्मा सूचना, सञ्चार तथा प्रचार विभाग प्रमुख तोकिए ।

फरमुल्लाह मन्सुरलाई मुस्लिम, अर्जुन प्रसाद जोशीलाई स्थानीय तह समन्वय विभाग र आनन्दप्रसाद ढुंगानालाई वित्तिय तथा सहकारी संस्था समन्वय विभाग प्रमुख तोकिएको छ ।

अजय चौरसियालाई तराई मधेस, शंकर भण्डारीलाई तरुण र सीता गुरुङलाई अदिवासी जनजाति विभाग प्रमुख बनाइएको छ ।

गोविन्द भट्टराई नेपाल जनसम्पर्क, चिनकाजी श्रेष्ठ उद्योग ब्यापार र शिवप्रसाद हुमागाइँ श्रमिक तथा ट्रेड युनियन विभाग प्रमुख बनेका छन् ।

देउवाले ५ जना नेतालाई भने केन्द्रीय कार्यसमितिमा आमन्त्रित सदस्यका रुपमा मनोनित गरेका छन् ।

कृष्णकिशोर घिमिरे, गोपालकुमरा बस्नेत, सुधीरकुमार शिवाकोटी, मनोहर नारायण श्रेष्ठ र ध्रुव वाग्ले अब आमन्त्रित सदस्य मनोनित भएको पार्टीले जानकारी दिएको छ ।

कांग्रेसमा आन्तरिक किचलोकै बीचमा विभागीय प्रमुखहरुको जिम्मेवारी तोकिएको हो ।