विश्व

अमेरिकामा कोरानाबाट मर्नेको संख्या ११, क्यालिफोर्नियामा संकटकाल

क्यालिफोर्निया । कोरोना भाइरसका कारण अमेरिकामा मात्र ११ जनाको ज्यान गएको छ । बिहीबार मात्र एक जनाको ज्यान गएपछि अमेरिकाको क्यालिफोर्निया राज्यमा संकटकाल घोषणा गरिएको छ ।

क्यालिफोर्नियामा ७१ वर्षीय वृद्धको अस्पतालमा उपचारका क्रममा ज्यान गएको हो । उनी सानफ्रान्सिस्कोबाट मेक्सिको गएका यात्रु थिए ।

क्यालिफोर्नियामा कोरोनाबाट पहिलो व्यक्तिको ज्यान गएको हो । अमेरिकामा १६ वटा राज्यका १५० भन्दा बढीमा यो भाइरसको संक्रमण देखिएको छ ।

अमेरिकामा ज्यान गएका कूल ११ मध्ये १० जना भने वाशिङ्गटन डिसी राज्यका बासिन्दा हुन् ।

कोरोना भाइरसले पछिल्लो समय टेक्सास र नेब्रास्कामा समेत आफ्नो उपस्थिति देखाइसकेको छ ।

संक्रमण बढेसँगै वाशिङ्गटन र फ्लोरिडा राज्यमा आपतकाल घोषणा गरिएको थियो ।

वाशिङ्गटन र फ्लोरिडा राज्यमा पनि आपतकाल घोषणा गरिएको थियो । कोरोनाको भाइरस चीनबाट प्रारम्भ भएको हो ।

यसले विश्वभर ९४ हजार बढीलाई संक्रमित बनाइसकेको छ । ८० हजार जना चीनमा मात्रै संक्रमित छन् ।

विश्वभर यस रोगका कारण ३ हजार २ सय जनाको ज्यान गएको छ । चीनमा २ हजार ९ सय ८१ जनाको मृत्यु भएको तथ्यांक रहेको छ ।