क्विन्सल्याण्ड । अष्ट्रेलियामा फेरी एक नेपालीको समुन्द्रमा डुबेर ज्यान गएको छ । केही महिना अगाडीसमेत यहाँ दुई नेपाली समुन्द्रमा डुबेर ज्यान गुमाउन बाध्य भएका थिए ।

अष्ट्रेलियाको क्विन्सल्याण्ड राज्यको समुद्रमा डुबेर पोखरा स्थायी घर भएका निकेस श्रेष्ठको ज्यान गएको स्थानीय प्रशासनले पुष्टी गरेको छ ।

बुधबार दिउँसो पौडी खेल्ने क्रममा निकेसलाई छालले तानेको थियो । उनी किनारमा उत्रन सकेनन् । छालले तानेर बेपत्ता पारेपछि उनका साथीहरूले उद्धारकर्मीलाई बोलाएका थिए ।

उद्धारकर्मीले ५ मिनेटको खोजीपछि किनारबाट २ सय मिटर पर तैरिरहेको अवस्थामा निकेसको शव फेला पारेका थिए ।

निकेस फेडेरेसन युनिभर्सिटीमा अध्यनरत रहेको बताइएको छ ।

उनीहरु पाँच जनाको समूहमा पौडी खेल्न निस्किएका थिए । निकेसको शव ब्रिजवेनको कुपर प्लेनस्थित शवगृहमा राखिएको छ ।

उनको शव नेपाल पठाउने तयारी भइरहेको गैरआवासीय नेपाली संघले उल्लेख गरेको छ ।