काठमाडौं । यस वर्षको एभरेष्ट प्रिमियर लीग खास बनाउने लक्ष्य आयोजकको थियो ।

संसारभरका विश्वस्तरीय खेलाडीलाई काठमाडौंमा उतारेर नेपाली दर्शकसामु प्रस्तुत गर्ने लक्ष्यसहित आयोजना गर्ने योजना बनाइएको एभरेष्ट प्रिमियर लीग (इपीएल) स्थगित भएको छ ।

टीयू मैदानमा आयोजना हुने यो प्रतियोगिता विश्वव्यापी संक्रमण कोरोना भाइरसका कारण स्थगित गर्नु परेको हो । टी-२० क्रिकेटका बादशाह क्रिस गेलसहित विश्वस्तरीय खेलाडी यस पटक नेपाल आउने तयारीमा थिए ।

प्रतियोगिता आउन पनि एक सातामात्र बाँकि रहेको अवस्थामा आयोजकले विश्वभर फैलिएको कारोना भाइरसका कारण प्रतियोगिता स्थागित गरिएको जनाएको छ ।

क्रिस गेलसहित विश्वका १६ स्टार खेलाडी नेपाल आउने पक्का भएको थियो । केही खेलाडीको सरप्राइज नाम सार्वजनिक गर्ने तयारी समेत थियो ।

तर, प्रतियोगिता नै स्थगित गर्नुपरेपछि त्यसले खेलप्रेमीलाई निरास मात्र बनाएर एक प्रकारको माहौलसमेत प्रभावित भएको छ ।

१ चैतमा यो प्रतियोगता उद्घाटनको तयारी थियो । आयोजकले बिहीबार पत्रकार सम्मेलन गरी प्रतियोगिता स्थगित भएको घोषणा गरेको हो ।

खेलाडी र फ्यानहरुको सुरक्षाका कारण प्रतियोगिता तोकिएको समयमा गर्न नसकिएको आयोजकको भनाई छ ।

आयोजक ईपीएल प्रालिका प्रवन्ध निर्देशक आमिर अख्तरका अनुसार अर्को सूचना जारी नभएसम्म प्रतियोगिता स्थगित भएको हो ।