नयाँ दिल्ली । कोरोना भाइरसका कारण संसारभर महामारी फैलिएसँगै भारतले पर्यटक भिसा बन्द गरेको छ ।

भारतले विशेषज्ञ, कूटनीतिक नियोगका प्रतिनिधि तथा कर्मचारी, यूएन तथा अन्य एजेन्सीमा कार्यक्रम कर्मचारी र प्रतिनिधि, विभिन्न परियोजनामा कार्ययत कर्मचारीबाहेक अन्य सबै प्रकारका भिसा बन्द गर्ने निर्णय गरेको हो ।

भारत सरकारले १५ अप्रिलसम्म भिसा रद्द गर्ने निर्णय गरेको हो । यसको कार्यान्वयन शुक्रबारबाट लागु हुने भएको छ ।

तर, कुनै नागरिकले भारत आउन चाहेमा उसले भारतीय कूटनीतिक नियोगमा सम्पर्क राखेर उचित कारण भने देखाउन सक्छन् ।

त्यसअवस्थामा उले यात्राको अनुमति पाउन सक्छ । चीनसहित अतिप्रभावित मुलुकबाट भारत छिर्ने सबै यात्रु अब अनिवार्य १४ दिनको क्वारेन्टाइनमा बस्नु पर्ने भएको छ ।

चीन, इटली, कोरिया, फ्रान्स, जर्मनी र स्पेनका नागरिकमा यस्तो प्रावधान ल्याइएको हो । भारतीय नागरिकलाई समते भारतले विदेश यात्रामा नजान कडा निर्देशन जारी गरेको छ । भारतमा बुधबार सम्म ६० जनामा कोरोनाको संक्रमण देखिएको छ ।