न्यूयोर्क । कोरोना भाइरसले अमेरिकामा बहुआयामिक असर गरिरहेको छ । त्यसले पारेका प्रभावहरु क्रमशः देखिन थालेको छ ।

संचारमाध्यमहरुका अनुसार गत साता अमेरिकामा ३३ लाख अमेरिकी नागरिकले आफू बेरोजगार भएको भन्दै भत्ता र अन्य सहयोगका लागि सरकार समक्ष पेश गरेका छन् ।

इतिहासमै यति धेरै नागरिकले एक साथ बेरोजगारी भत्ताका लागि सरकार गुहार्नु परेको हो ।

अमेरिकाको लेवर डिपार्टमेन्टका अनुसार कोरोनाबाट अमेरिकी अर्थतन्त्र नराम्रोसँग प्रभावित बनेको छ । जसले गर्दा नागरिकहरुमा बेरोजगारी दर अकल्पनीय रुपमा बढेको हो ।

तीन साता अगाडी देशभरबाट मात्र दुई लाख अमेरिकी नागरिकले मात्र बेरोजगार भत्ताको माग गर्दै निवेदन दिएको तथ्यांक संचारमाध्यमले सार्वजनिक गरेका छन् ।

यसअघि सन् १९८२ मा एक सातामै ६ लाख ९५ हजार अमेरिकीले बेरोजगार भत्ताका लागि निवेदन दिएका थिए।

यो संख्या अहिले भने निकै बढेको छ । कोरोनाले अमेरिकाको अर्थतन्त्र सन् २०३० यता कै कमजोर हुने आंकलन गरिएको छ । अमेरिकामा तिब्र आर्थिक मन्दीको आंकलन समेत गरिएको छ ।

कोरोना भाइरस अमेरिकामा तिब्र रुपमा फैलिरहेको छ । चीनमा भन्दा अमेरिकामा बढी संक्रमित पुगिसकेका छन् ।

यहाँ कोरोनाले १ हजार भन्दा बढीको ज्यान लिइसकेको छ ।