काठमाडौं । नेपालका प्रितम आचार्य भारतीय चर्चित रियालीटी शो सारेगमपको तेस्रो स्थान जित्न सफल भएका छन् । जी टीभिबाट प्रसारण हुने यो कार्यक्रमको फाइनल प्रतिस्पर्धामा उनी तेस्रो भएका हुन् ।

अर्को नेपाली बालक आयुष केसीलाई चौथो स्थान प्राप्त भयो । यस कार्यक्रकको फाइनलमा ६ जना प्रतिस्पर्धी थिए । सुनसरीको इटहरी उपमहानगरपालिका प्रितमले यस प्रतियोगिताको शुरु देखि नै आफूलाई दावेदारका रुपमा खडा गरेका थिए ।

सन् २००६ बाट शुरु भएको यो कार्यक्रम भारतको लोकप्रिय रियालिटी शो भित्र पर्छ । यस शोमा ५ देखि १४ वर्षसम्मका बालबालिकाले भाग लिन पाउने प्रावधान रहेको छ । यस सिजनमा गायकहरू शान, अमाल मलिकका साथै रिचा शर्मा जजको भूमिकामा थिए ।

एघार वर्षीय प्रितम इटहरीस्थित विश्व आदर्श स्कुलमा कक्षा ६ मा पढ्छन्। भक्तपुरको मोर्डन बोर्डिङ स्कुलमा कक्षा ७ पढ्ने आयुस वर्ष १२ का हुन् । आयुस र प्रितम नेपालबाट पहिलो चरणको अडिसन बीना नै छानिएका प्रतिभा हुन् ।

जिटिभीले सुरशाला एकेडेमीमार्फत् आयुस र प्रितमले गाएका गीतका भिडियो हेरेर उनीहरूलाई सोझै दोस्रो चरणका लागि दिल्ली बोलाएको थियो। दिल्लीमा आयुष र प्रितमसँगै अरु ८ जना नेपाली बालबालिकाले अडिसन दिएका थिए।