काठमाडौं । सरकारले तोकिएको अवधि भित्र अनिवार्य क्वारेन्टाइनमा नबस्नेमाथि कानूनी कारवाही शुरु गर्ने भएको छ ।

खासगरी विदेशबाट फर्केका व्यक्तिले निर्वाध घुम्ने, डुल्ने गरेको र स्थानीय तहमा क्वारेन्टाइनमा बस्न अटेरी गरेको खबर सार्वजनिक भएको छ ।

शनिबार बागलुंगमा कोरोना प्रभावित पुष्टी भएकी युवती ज्वरो आउँदा पनि क्वारेन्टाइनमा नबसेको र गाउँमा निर्वाध डुलेको खबर सार्वजनिक भएको थियो ।

यो देशभर नै जारी छ । सोहीकारण सरकारले क्वारेन्टाइनमा बस्नुपर्ने व्यक्ति बाहिर डुलेको भेटिए सरुवा रोगसम्बन्धी कानूनी प्रावधान अनुसार पक्राउ गरी कारवाही गरिने चेतावनी दिएको छ ।

सरुवा रोगको फैलावट हुन नदिन प्रभावित देशबाट आएका व्यक्ति अनिवार्य क्वारेन्टाइनमा बस्नुपर्छ । कोरोना सम्बन्धी उच्चस्तरीय संयन्त्रको बैठकमार्फत सरकारले यस्तो चेतावनी दिएको हो ।