काठमाडौं । देशले १८ औं गभर्नरका रुपमा महाप्रसाद अधिकारीलाई प्राप्त गरेको छ । मन्त्रिपरिषद्को सोमबार बसेको बैठकले नेपाल राष्ट्र बैंकको गभर्नरमा महाप्रसाद अधिकारीलाई नियुक्त गर्ने निर्णय गरेको हो ।

यससँगै आगामी पाँच बर्षे कार्यकालका लागि अधिकारी गभर्नर बनेका हुन् । अर्थमन्त्री संयोजक रहेको सिफारिस समितिले गभर्नरका लागि सोमबार तीन जनाको नाम मन्त्रिपरिषद्मा सिफारिस गरेको थियो।

सिफारिसमा बरिष्ठ डेपुटी गभर्नर चिन्तामणि शिवाकोटी, अधिकारी र पुर्वसचिव केशव भट्टराईको नाम थियो । मन्त्रीपरिषद्ले अधिकारीलाई नियुक्त गरेको छ ।

अधिकारी अर्थमन्त्री डा. युवराज खतिवडाका प्रिय पात्रसमेत हुन ।

उनीहरुबीचमा लामो सहकार्य समेत भएको छ । अधिकारी यसअघि लगानी बोर्डको प्रमुख कार्यकारी अधिकृत पदमा थिए ।

गभर्नरलाई प्रधानन्यायाधिसले सथप ग्रहण गराउने प्रावधान रहेको छ । अधिकारी अघिल्लो पटक चिरन्जिवी नेपाल गभर्नर हुने समयमा समेत गभर्नरको सिफारिसमा परेका थिए । उनीसँगै नेपाल र गोपाल काफ्ले गभर्नरमा सिफारिस भएका थिए।

नेपाल पाँच बर्षे कार्यकाल पुरा गरेर चैत ५ मा बिदा भइसकेका छन् ।

चैत १८मा अर्थमन्त्री डा. युवराज खतिवडाको समितिमा पुर्व गभर्नरका तर्फबाट विजयनाथ भट्टराई र पूर्व सचिव कृष्णहरि बाँस्कोटालाई राखेर गभर्नर सिफारिस समिति बनाएका थिए ।

अधिकारीले बिजिनेस एड्मिनिस्ट्रेसन स्नातक पास गरेका छन् । उनले भारतबाट चार्टर्ड एकाउन्टेन्ट डिग्री समेत प्राप्त गरेका छन् । उनीसँग करीव ३० वर्षको बैंकिंग अनुभव रहेको छ ।