काठमाडौं । नेपालमा लगातार दोस्रो दिन कोरोनाका नयाँ संक्रमित बिरामी फेला परेनन् । स्वास्थ्य मन्त्रालयले सोमबार जारी गरेको नियमित प्रेस ब्रिफिंग अनुसार आइतबार र सोमबार थप संक्रमण पुष्टी भएन ।

२४ घण्टा भित्र कूल २२५ वटा नमुनाको परीक्षण भएको थियो । यससँगै नेपालमा कूल नमूना परीक्षणको संख्या १८९० पुगेको छ ।

जसमध्ये ९ जनामा मात्र कोरोनाको पुष्टी भएको छ । उनीहरुमध्ये पनि एक जना भने घर फर्किसकेका छन् ।

स्वास्थ्य तथा जनसंख्या मन्त्रालयका प्रवक्ता डा. विकास देवकोटाका अनुसार १ सय ९ जनाको नमुनाको रिपोर्ट भने आउन बाँकि रहेको छ ।

देशभर कूल ३० हजार ५ सय ६६ क्यारेन्टाइन बेड उपलब्ध रहेका े छ । जहाँ अहिले ९ हजार १ सय ६८ जना व्यक्ति बसेका छन् ।

अझै पनि तेब्बर संख्यामा सम्भावित संक्रमितलाई राख्ने गरी क्वारेन्टाइन तयार भएको मन्त्रालयले जनाएको छ ।

देशभर आइसोलेसन बेड भने ३ हजार २ सय ५९ रहेको छ । अहिले आइसोलेसनमा भने ९५ जना बिरामी रहेका छन् ।

सरकारले सुदुरपश्चिम र बागलुंगमा भने र्यापिड टेस्टको तयारी गरेको छ । यसका लागि टोलीहरु खटिइसकेको मन्त्रालयले जनाएको छ ।

र्यापिड टेस्ट भने २० हजार मानिसमा गरिने भएको छ ।