काठमाडौं । यूएइका युवराज मोहम्मद बीन जायदले नेपालीको प्रसंशा गरेका छन् ।

सोमबार साँझ प्रधानमन्त्री केपी शर्मा ओलीसँगको टेलिफोन वार्ताका क्रममा उनले नेपाली इमानदार र परिश्रमी रहेको भन्दै प्रसंशा गरेका हुन ।

युवराज जायदले नेपालीलाई यूएइले आफ्नै नागरिक सरह व्यवहार गर्ने भन्दै उनीहरुको सुरक्षामा ढुक्क हुन समेत प्रधानमन्त्रीलाई आश्वस्त पारेका छन् ।

प्रधानमन्त्रीले यूएईमा रहेका नेपाली कामदारको सुरक्षा र कोरोनाका कारण उनीहरुको रोजगारी समस्याका सन्दर्भमा त्यहाका राजकुमारसँग आग्रह गरेका हुन् ।

पछिल्लो समय प्रधानमन्त्री केपी शर्मा ओलीले नेपाली नागरिकको बाहुल्य रहेका मुलुकका सरकार प्रमुखहरुसँग सम्वाद गरी उनीहरुको सुरक्षामा चासो दिइरहेका छन् ।

यसअघि उनले बहराइनका प्रधानमन्त्रीसँग टेलिफोन वार्ता गरेका थिए । यूएइमा करीव २ हजार मानिसमा कोरोना भइसकेको छ । त्यसमध्ये अधिकांश आप्रबासी रहेका छन् ।