लण्डन

कोरोना भाइरस संक्रमित बेलायती प्रधानमन्त्री बोरिस जोन्सनलाई इन्टेन्सिभ केयर युनिट (आईसीयू) बाट बाहिर निकालिएको छ । स्वास्थ्यमा निरन्तर सुधार आएपछि उनलाई स्थानीय समय अनुसार बिहिबार साँझ जनरल वार्डमा सारिएको उनका प्रवक्ताले जनाएका हुन् ।

वार्डमा उनी चिकित्सकहरुको प्रत्यक्ष निगरानीमा रहेको जनाइएको छ । ५५ बर्षिय जोन्सनलाई दुई साता अघि कोरोना भाइरस संक्रमण देखिएको थियो । स्वास्थ्यमा जटिलता देखिएपछि उनी आईतबार लण्डन स्थित सेन्ट थोमस अस्पतालमा भर्ना भएका थिए । अस्पतालमा थप समस्या देखिएपछि भोलीपल्टै उनलाई आईसीयूमा सारेर अक्सिजन दिएको थियो ।

जोन्सन आईसीयूबाट निस्किनु अघि जोन्सनले युके नेशनल हेल्थ सर्भिसका विज्ञहरुको सेवाप्रति धन्यवाद दिएको उनलाई उद्धृत गर्दै प्रवक्ताले जनाएका छन् । जोन्सन अस्पताल भर्ना भएपछि बिदेशी मन्त्री डोमिनिक राबले कार्यबाहक प्रधानमन्त्रीको जिम्मेवारी सम्हाली रहेका छन् ।

(तश्वीर: एनबीसी न्यूज)