मस्कट । कोभिड १९ संसारका सबैजसो मुलुकमा फैलिएको छ । यसले सबै देशका नागरिकलाई समस्यामा पारेको छ । त्यसमा पनि संकटका बेला आप्रबासी नागरिक तथा कामदार बढी समस्यामा पर्छन् ।

किनकी स्वाभाविक रुपमा मुलुकहरुको प्राथमिकता आफ्ना देशका नागरिकको सुरक्षा प्रमुख हुन्छ । कोभिड–१९ बाट ओमानमा रहेका नेपाली भने सुरक्षित रहेको पाइएको छ ।

मस्कटस्थित नेपाली दूतावासले हालसम्म कुनै पनि नेपालीमा कोरोनाको सङ्क्रमण नभेटएको भन्दै खुसीको खबर सार्वजनिक गरेको छ ।

ओमान ठूलो संख्यामा नेपाली कामदार रहेको मुलुक मध्ये एक हो । कोरोना भाइरसबाट ओमानमा ४५७ जना सङ्क्रमित छन् ।

दुई जनाको मृत्यु भइसकेको छ । ७१ जना निको भएका छन । कोरोनाबाट संसारका अन्य मुलुकमा भने ९ जना नेपालीको ज्यान गइसकेको ।

विभिन्न मुलुकमा १ सय भन्दा बढी नेपालीमा कोरोनाको सङ्क्रमण देखिएको छ ।

ओमानले चैत २८ देखि आगामी वैशाख १२ गतेसम्म लकडाउनको घोषणा गरेको छ । यस समयमा अत्यावश्यकबाहेक कुनै पनि काममा घर बाहिर ननिस्कन दुतावासले सबै नेपालीमा आग्रह गरेको छ।

ओमानमा रहेका तथा बिदामा नेपाल आएका नेपालीको भिसाको म्याद समाप्त भए अनलाइनबाट भिसा थप गर्ने व्यवस्था मिलाएको दूतावासले उल्लेख गरेको छ ।