काठमाडौं । दक्षिण एशियाली सहयोग संगठन (सार्क) अन्तर्गत कोभिड १९ आपतकालिन कोषमा पाकिस्तानले ३० लाख अमेरिकी डलर सहयोग गरेको छ ।

यस कोषमा भारतले १ करोड डलर हालेको थियो । नेपालले १० लाख डलर सहयोग घोषणा गरेको थियो ।

सार्क कोभिड १९ आपतकालिन कोषको प्रतिवद्धतामा सबै सदस्य राष्ट्रले समय, तरिका र त्यसको कार्यन्वयनका बारेमा निर्णय गर्नुपर्ने भन्दै पाकिस्तानले रकमको घोषणा गरेको हो ।

पाकिस्तानले सबैभन्दा अन्तिममा रकमको घोषणा गरेको हो ।

तर, पाकिस्तानले यसै साता कोरोना भाइरस संक्रमणबाट यस क्षेत्रको व्यापारमा पर्नसक्ने सम्भावित असरका बारेमा छलफल गर्नका लागि बोलाइएको सार्क राष्ट्रबिचको भिडियो सम्मेलनमा भाग लिन भने अस्वीकार गरेको थियो।

पाकिस्तानले यस्तो काम सार्क सचिवालयले गर्नुपर्ने बताउँदै छलफलमा आउन अस्वीकार गरेको थियो।

भारतले सचिवालयको नाममा पाकिस्तानले औपचारिक हिसाबले कोरोना सम्बन्धी छलफल दबाउन खोजेका आरोप लगाउँदै आएको छ ।

कोरोना कोषमा भारतले श्रीलंकाले ५० लाख डलर, बंगलादेशले १५ लाख डलर, नेपाल तथा अफगानिस्तानले दश–दश लाख डलर एवं मालदिभ्स र भुटानले एक–एक लाख डलर जम्मा गर्ने घोषणा गरेका छन् ।

यो कोष बनाउने प्रस्ताव भने भारतीय प्रधानमन्त्री नरेन्द्र मोदीले गरेका हुन् ।