न्यूयोर्क । कोरोना भाइरसको संक्रमणका कारण अमेरिकामा मात्र करीव २४ हजार मानिसको ज्यान गएको छ ।

विश्व स्वास्थ्य संगठनको तथ्यांक अनुसार कोरोनाका कारण सोमबार साँझसम्म २३ हजार ६ सय ४० जना मानिसिको ज्यान गएको छ ।

यो कुनै पनि मुलुकमा कोरोना भाइरसको संक्रमणबाट भएको सर्वाधिक मानवीय क्षति हो । विश्वभर भने मृत्यु हुनेको संख्या १ लाख १९ हजार पुगेको छ ।

पछिल्लो तथ्यांकअनुसार विश्वभर एक लाख १९ हजार ११३ जनाको कोरोनाका कारण मृत्यु भएको छ । विश्वभर संक्रमितको संख्या १९ लाख १७ हजारभन्दा बढी छ ।

अमेरिकामा हालसम्म ५ लाख ७७ हजार व्यक्तिमा कोरोना संक्रमण पुष्टि भएको छ । अमेरिकापछि इटलीमा बढी मानवीय क्षति भएको छ ।

यस मुलुकमा २० हजार ४ सय ६५ जनाको कोरोना संक्रमणबाट ज्यान गएको छ । अमेरिकाको न्यूयोर्कमा १ लाख ९५ हजारभन्दा बढी संक्रमित भेटिएका छन् ।

यहाँ मृतकको संख्या १० हजार भन्दा बढी रहेको छ ।

न्यूयोर्कपछि न्यूजर्सीमा २ हजार ४ सय ४३, मिशिगनमा १ हजार ४ सय ८७, लुसियानामा ८ सय ८४ र म्यासाच्युसेट्समा ७ सय ५६ जनाको कोरोनाको कारण मृत्यु भएको तथ्यांक रहेको छ ।