वासिंटन । अमेरिकामा करीव ३३ लाख मानिसमा कोरोनाको परीक्षण गरिएको छ ।

सम्भावित अधिकांश नागरिकको परीक्षण सम्पन्न भएको र केही राज्य अब छिट्टै खुला गर्ने तयारी गरिएको राष्ट्रपति डोनाल्ड ट्रम्पले जानकारी दिएका छन् ।

उनले अमेरिकामा कोरोना भाइरस महामारीको उत्कर्ष पार भइसकेको बताउँदै अब क्रमशः राज्यहरु खुला गर्दै जाने योजना रहेको बताएका हुन ।

उनका अनुसार केही राज्य यसै महिनाबाट पुनः संचालनमा आउनेछन् । दैनिक मिडिया ब्रिफिङका क्रममा उनले राज्यहरु खुला गर्ने विषयमा गभर्नरहरुसँग छलफल जारी रहेको समेत जानकारी दिए ।

उनका अनुसार बिहीबार नै यसको घोषणा गर्ने तयारी रहेको छ । अमेरिकामा अहिलेसम्म ६ लाख ३५ हजार जनामा कोरोना भाइरस संक्रमण भएको छ ।

यहाँ २८ हजारभन्दा धेरैको मानिसले ज्यान गुमाएका छन् । यो कुनै पनि मुलुकमा कोरोनाका कारण भएको सबैभन्दा ठूलो क्षति हो । उनले छिट्टै उत्साहजनक समाचार आउने समेत उल्लेख गरेका छन् ।