जेनेभा । विश्व स्वास्थ्य संगठन(डब्लुएचओ)ले संगठनलाई अमेरिकाले दिदै आएको सहयोग रोक्ने चेतावनीप्रति दुख व्यक्त गरेको छ ।

अमेरिकी राष्ट्रपतिले संगठनलाई अमेरिकाले दिँदै आएको सहयोग कटौतीको घोषणा गरेका थिए ।

उनको यस निर्णयको विश्वभर आलोचना भएको छ । राष्ट्रसंघले समेत संकटको समयमा संगठनलाई सहयोग कटौती गर्न नहुने बताइसकेको छ ।

डब्लूएचओले समेत वर्तमान समय विश्व नै एक भएर नयाँ कोरोना भाइरसविरुद्ध लड्ने समय भएको भन्दै सहयोग काट्नु दुखद भएको उल्लेख गरेको छ ।

अमेरिका कोरोनाबाट सबैभन्दा बढी प्रभावित मुलुक हो । डब्लूएचओले बेलैमा सही परामर्श नदिएको र चीन परस्त भएको आरोप अमेरिकाको छ ।

डब्लुएचओका प्रमुख डा. ट्रेडोस अडामोन गेब्रेससले आफ्नो सबैभन्दा ठूलो आर्थिक दाता अमेरिकाले उठाएको कदमप्रति प्रतिक्रिया दिदैं अमेरिका डब्लुएचओको लामो समयदेखिको उदार मित्र भएको र उसले त्यसलाई निरन्तरता दिइराख्ने आशा राखिएको उल्लेख गरे ।

अमेरिकी सहयोग बन्द भएपछि त्यसले डब्लुएचओको कामलाई पार्ने प्रभावको बारेमा समीक्षा भइरहेको समेत उनले जानकारी दिए । अमेरिकाले डब्लूएचओको सबैभन्दा ठूलो दाता हो ।