काठमाडौं । नेपाल एयरलाइन्सका दुई वटै वाइडबडी जहाज बिहीबार साँझ चीन उडेका छन् ।

नेपालका निजी कम्पनीले यी दुई जहाज कार्गो उडानका लागि चार्टर्ड गरेका हुन् । मेडिकल सामग्री लिएर यी जहाज शुक्रबार बिहान काठमाडौं अवतरण गर्ने कार्यक्रम रहेको छ ।

यसअघि पनि नेपाल एयरलाइन्सल चीनमा दुई पटक चार्टर्ड उडान गरिसकेको छ । नेपाल एयरलाइन्सले चीनको ग्वानझाओबाट मेडिकल सामान नेपाल ल्याइरहेको छ ।

यी जहाजले कोरोनाको संक्रमण रोकथाम तथा नियन्त्रण सम्बन्धी मेडिकल सामग्री लिएर काठमाडौं आउनेछन् ।

उता, शुक्रबार श्री एयरलाइन्सको जहाज मेडिकल सामग्री नै लिन सिंगापुर उड्न तयारीमा छ । त्यसका लागि प्रक्रिया थालिएको पर्यटन मन्त्रालयले जनाएको छ ।

यो उडान भने श्री एयरलाइन्सले सरकारका लागि निशूल्क गरिदिन लागेको बताइएको छ ।

सिंगापुरमा एक संस्थाले सरकारलाई मेडिकल सामग्री हस्तान्तरण गरेको छ ।