काठमाडौं । कोरोना प्रभावित मुलुकबाट फर्किएपछि पनि स्वास्स्थ्य जाँच नगरी बसिरहेका सबै व्यक्तिलाई सरकारले कारोनाको परीक्षणको दायरामा आउन आह्वान गरेको छ ।

स्वास्थ्य तथा जनसंख्या मन्त्रालयले चैतमा विदेशबाट आएका सबैलाई र्‍यापिड डायग्नोस्टिक विधि (आरडीटी) विधिको परीक्षणमा सहभागी हुन आह्वान गरेको हो ।

मन्त्रालयले बिहीबार सार्वजनिक सूचना जारी गर्दै चैतमा विदेशबाट आएका, कोरोना पोजेटिभ बिरामीको सम्पर्कमा आएका, कोरोनाको लक्षण देखिएका र उनीहरुको सम्पर्कमा आएका सबैले र्‍यापिड टेस्ट गर्नुपर्ने बताएको हो ।

कोरोनाको उपचारमा खटिएका स्वास्थ्यकर्मी, सुरक्षाकर्मीलगायतले पनि र्‍यापिड टेस्टमा सहभागी हुनुपर्ने भएको छ ।

अब सरकारले कोरोनालाई सम्भावित क्षेत्रको पहिचानमा   लैजाने योजना बनाएको छ ।

त्यसअनुसार अतिप्रभावित क्षेत्रलाई सिल गरेर अन्य क्षेत्र वा कम प्रभावित क्षेत्रलाई क्रमशः खुला गर्ने रणनीतिमा सरकार जाने भएको छ ।

लामो समय लकडाउनमा जाँदा त्यसले अन्य समस्या निम्त्याउने भन्दै सरकारले सम्भावित जोखिमपूर्ण क्षेत्रमा कोरोनाको परीक्षणलाई तिब्र बनाउन लागिएको हो ।