काठमाडौं । अमेरिकी सरकारले अमेरिकालाई पुनः खुला गर्ने सम्बन्धमा योजना सार्वजनिक गरेको छ ।

राष्ट्रपति डोनाल्ड ट्रम्पले देशलाई पुनः सामान्य अवस्थामा फर्काउने योजना सार्वजनिक गरेका हुन् । जनजीवन सामान्य बनाउन उनले तीन चरणको प्रस्ताव गरेका हुन् ।

‘ओपनिङ अप अमेरिका अगेन’ नाम दिइएको यो योजनामा स्कुल र कार्यालय फेरि खोल्ने प्रयोजनका लागि तीन चरणमा काम गर्ने प्रस्ताव गरिएको छ ।

केन्द्र सरकारको यो प्रस्तावमा अब राज्यले आफ्ना सुझाव दिनु पर्र्ने भएको छ । १४ दिनको मा एक चरणको योजना कार्यान्वयन गरिने भएको छ ।

लामो समय बन्द गरेर राख्दा अर्थव्यवस्था नै धरासायी हुन सक्ने भन्दै अमेरिकालाई पुनः सूचारु गर्ने प्रयास थालिएको हो ।

योजनाको पहिलो चरणमा सामाजिक दुरी कायम गर्दै स्कुल र कार्यालय खोलिने भएको छ ।

यसपछि सङ्क्रमण दर घटेसँगै दोस्रो चरणको योजना कार्यान्वयन थालिने भएको छ ।

त्यसबेला सीमित सङ्ख्यामा कर्मचारीलाई कार्यालय जाने दिने भएपनि ५० जनाभन्दा धेरै मानिस एकै ठाउँमा जम्मा हुन नपाउने नियाम ल्याइएको छ ।

तेस्रो चरणमा भने सबै कार्यालय सामान्य रुपमा खोल्न अनुमति पाउने छन् । अमेरिका कोरोनाबाट सबैभन्दा धेरै प्रभावित देश हो ।