धनगढी । सुदुरपश्चिममा कोरोना सक्रमण पुष्टी भएका ५ जनामध्ये एक जना पुरुषको दोस्रो रिपोर्ट निगेटिभ आएको छ ।

यसको मतलव उनमा समेत कोरोनाको भाइरस अब निष्क्रिय बनेको छ । सेती प्रादेशिक अस्पतालमा उपचार गराइरहेका कोरोना संक्रमित ५ जनामध्ये एक जनाको दोस्रो रिपोर्ट नेगेटिभ आएको हो ।

भारतबाट फर्किएका लम्की चुहा नगरपालिका १ का २१ वर्षका युवकमा दोस्रो रिपोर्ट नेगेटिभ आएको हो ।

अस्पतालका अनुसार भारतबाट आएर कैलालीस्थित प्रतापपुर क्वारेन्टाइनमा बसेका उनको स्वाब परीक्षणमा कोरोना संक्रमण पुष्टि भएको थियो ।

त्यसपछि उनलाई सेती प्रादेशिक अस्पतालको आइसोलेसन वार्डमा ल्याइएको थियो । सेती प्रादेशिक अस्पतालमा उपचाररत अन्य चार जना कोरोना संक्रमितको भने दोस्रो रिपोर्ट पनि पोजेटिभ नै आएको छ ।

धनगढी उप–महानगरपालिका वडा नम्वर ५ का ३४ बर्षीय युवक, उनकी ३४ बर्षीय भाउजु, कञ्चनपुरको बेदकोट नगरपालिकाका ४१ बर्षीय पुरुष र लम्की चुहा नगरपालिका १ कि ६५ वर्षीया महिलाको कोरोना रिपोर्ट पोजेटिभ नै आएको छ ।

दुई पटकसम्म पोजेटिभ आएको धनगढी ५ का ३४ बर्षीय अर्का युवकको तेस्रो रिपोर्ट पनि पोजेटिभ आएको छ ।

काठमाडौंमा दोस्रो संक्रमित भने अस्पतालबाट डिस्चार्ज भएकी छिन् । नेपालमा कुल ३० जनामा संक्रमण देखिए पनि सबैको अवस्था सामान्य रहेको छ ।