न्युयोर्क

न्युयोर्क राज्यका गभर्नर एन्ड्रु कुमोले न्युयोर्कमा कोरोना संक्रमण महामारीको ” ‘हाफ टाईम’ भएको बताएका छन् । गत मार्च १ तारिख ईरान भ्रमणबाट न्युयोर्क फर्किएकी ३९ बर्षीया महिलामा पहिलो पटक कोरोना संक्रमण देखिएको न्युयोर्कमा झन्डै डेढ महिना पछि २ लाख संक्रमित र १८ हजार ५ सयको मृत्‍यु भै सकेको छ । गभर्नर कुमोले न्युयोर्कमा कोरोना संक्रमणको हाफ टाईम भएको कुरा आइतबार उनको नियमित प्रेस ब्रिफिङमा बताएका हुन् । आईतबार आयोजित प्रेस ब्रिफिङमा कुमोले भनें; “कोरोनासँगको लडाईं अहिलेसम्म हामीले जितेका छैनौं र कुनै पनि ब्यापार ब्यवसाय पुन: सुचारु गर्ने कुरा आगामी दिनमा देखिने कोरोना संक्रमितको संख्या र कोरोना जाँचको संख्यामा निर्भर हुनेछ। कोरोनासँगको हाम्रो लडाईंको अवस्था अहिले हाफ टाईम मात्र हो” ।  

प्रेस ब्रिफिङमा कुमोले अहिलेको अनुभबबाट अब न्युयोर्कको पुनर्निमाण गर्नु पर्ने शिक्षा मिलेको समेत बताउँदै भनें “यसबाट  सिकेर अगाडि बढदै पहिले भन्दा कसरी राम्रो न्युयोर्क बनाउने भन्ने शिक्षा मिलेको छ । अब न्युयोर्कलाई सुचारु गर्दा पहिले भन्दा सहज परिस्थितीमा खोल्न्नु पर्दछ” ।