काठमाडौं । समाजवादी पार्टीलाई फुटाएर केही नेतालाई सरकारमा सामेल गराउने प्रधानमन्त्री केपी शर्मा ओलीको दाउपेच योजनामै सिमित भएको छ ।

महेश बस्नेतसहित आफ्ना दुई सांसद र पूर्वप्रहरी महानिरिक्षक सर्वेन्द्र खनाललाई प्रयोग गरी संघीय सांसदलाई काठमाडौं ल्याएर पार्टी फुटाउने कसरत गर्दा पनि समाजवादी पार्टी फुटेन ।

बरु समाजवादी र राष्ट्रिय जनता पार्टीबीच एकता भएको छ । ओलीले पार्टी फुटाएर फूटको राजनीति गर्न चाहेको खुलासा भएसँगै दुई दलले रातारात एकता प्रक्रिया टुंग्याएका हुन् ।

समाजवादी र राष्ट्रिय जनता पार्टीबीच एकता भएर ‘जनता समाजवादी पार्टी’ (जसपा) बनेको छ ।

यस पाटीले बिहीबार नै दल दर्ताका लागि निर्वाचन आयोगमा निवेदन समेत दिएको छ ।

फलस्वरुप पार्टी फूटाएर राज गर्न खोजेका प्रधानमन्त्रीको योजना तुहिएको हो ।

यही प्रयोजनका लागि प्रधानमन्त्रीले दल दर्ता सम्बन्धी विधेयक नै ल्याउनु परेको थियो । यसैबीच प्रधानमन्त्री बीना प्रचण्ड निवास खुमलटारमा नेकपाका उच्च नेताहरुको भेला भएको छ ।

बिहीबार साँझ भएको उक्त भेलाले सरकारद्धारा दल विभाजन सम्बन्धीका ल्याएको विधेयक फिर्ता लिनुपर्ने निष्कर्ष निकालेको छ ।